Orxan Bayramov 15 aprel 1985-ci ildə Lənkəran rayonunun Boladı kəndində dünyaya gəlib. 1991–2002-ci illərdə orta təhsilini Boladi kənd Şəhid Nahir Axundov adına 1 saylı orta məktəbdə almışdır. 2003–2004-cü illərdə hərbi xidmətdə olmuşdur. 2005–2010-cu illərdə Azərbaycan Dövlət Maliyyə-İqtisad Kollecində Maliyyə və Kredit fakültəsində orta-ixtisas təhsili almışdır. 2010–2014-cü illərdə Azərbaycan Dövlət Mədəniyyət və İncəsənət Universitetinin Rejissorluq fakültəsində ali təhsil almışdır. 2009-cu ildən 2014-cü ilə qədər Azərbaycan Kapoeyra Federasiyasında müəllimlik etmiş və yaradıcılıq işləri ilə məşğul olmuşdur. Yaradıcılıq illəri 2010-cu illərdən başlayır. 2010–2013-cü illərdə özü tərəfində yaradılan Yarasa Film şirkətində ssenari müəllifliyini və quruluşçu rejissorluğunu etdiyi "Ölümün Döngəsində", "Ölümün Döngəsində 2" və "Pul Kisəsi" filmlərini ərsəyə gətirir. Azərbaycan Kapoeyra Federasiyasında çalışdığı vaxtlarda "Sport Service Company" ilə birgə ssenari müəllifi və quruluşçu rejissorluğunu etdiyi "Ekoloji Missiya" (ing. Ecological Mission) və "Ölümün Döngəsində 3" (ing. Turn of Death 3) adlı iki qısametrajlı filmlərini ərsəyə gətirir. 2015-ci ildə "Yarasa Film" şirkətinin adını "Yarasa Art Pictures"lə əvəz edir və ilk peşəkar film karyerasına qədəm qoyur. 2015–2017-ci illərdə Azərbaycan və Türkiyənin ortaq layihəsi olan, ssenarisi Eren Azaka məxsus olan "Bir zamanlar Şəkidə" (ing. The Game) adlı ilk tammetrajlı bədii filmini ərsəyə gətirir. "Öldür-Öldür" ("Kill Kill") adlı qısametrajlı filmi NAFCo (NORTHERN APPALACHIAN FILM COLLECTIVE) Winter Film Festivalının "Judges Awards Drama" nominasiyasının qalibi olub.
